يا رب أنت عارف إني حواليا وساخة كتير في كل مكان ، و كأي بني آدم الوساخة دي بتأثر على نقاء روحه 
سلم روحي منهم و من قرفهم . 
الجيران لسه بيرموا الزبالة ادام باب الشقة ، كل مرة بلمها ، بس أنا عندي طاقة ، النهرده أول مرة مرضاش أشيلها و أسيبها زي ما هي بالظبط ، يمكن يحسوا ع دمهم ، اتاريهم رموا عليها زبالة أكتر عشان لما افتح باب الشقة تقع عليا . 

أنا بس مبقتش قادرة أتحمل ، إديني شوية طاقة عشان أعرف أكمل لحد ما أمشي و أجي عندك 

أنا : ماما إحنا اتعشينا ؟ 
ماما : أومال البطاطس دي كانت إيه ؟ 
أنا : آه صح .. طب خلاص
ماما : إنتي جعانة ؟ 
أنا : لأ .. بس لازم اتعشى ! 

الجو جميل أوي النهرده ، في حاجة حلوة فيه  .. بوسة ملايكة ، روح حد بحبه محاوطاني ، حضن من ربنا .. أفتحوا الشبابيك و البلكونة ، خدوا شوية حُب 

في قطة سودا قاعدة في الشارع بتاعنا أديلها كام يوم .. 
النهرده الصبح أول ما فتحت باب العمارة طلعت في وشي ، أتخضيت في الأول ، و بعدين لقيتها بتبص بحنية فضحكتلها و مشيت ..

بحكي لماما من شوية عنها ، قالتلي مش إنتي بس دي كده مع كل الجيران ، تطلع تجري عليهم كل يوم الصبح ، النهرده كان في شباب بيصلحوا العربية ، فضلت القطة تلعب معاهم ، جابوا ليزر و خلوها تطلع تجري و تنطط و اتبسطت بما فيه الكفاية ، بابا نادى عليا قالي تعالي بسرعة شوفي القطة دي :)) 

كان في واحد تاني في الشارع بيتكلم في التليفون ، القطة فضلت لازقة في رجله ، يمشي تمشي جمبه ، يطلع تجري فتجري ، يقف فتروح بصاله و تضحك و تقف .. 

كان في قط من شوية بيحاول يدايقها و عمالة تنونو بصوت عالي منه ، لقيت نص أولاد الشارع طلعوا يجروا عليها و زعقوا للقط خلوه يمشي . 

ماما : مش عارفة على إيه ، دي قطة سودا أومال لو كانت بيضا كانوا عملوا إيه 
بابا : بس روحها حلوة 

القطة دي بتشع بهجة :) 

في بنوتة صغيرة حوالي 3 سنين ، أوضتها في وش أوضتي من الجمب 
مبعرفش أنام و لا أذاكر و حتى أسمع مزيكا بسبب شقاوتها 

أسمها فريدة 
مليانة طاقة ، ليل نهار بتضحك و تزعق و تغني 
أنا بحبك يا فريدة برغم إني عمري ما شوفتك لحد دلوقتي 

يا رب .. 
أنا ممكن أتحمل أي حاجة ، إلا إحساس التقل 

مش عايزة أحس إني تقيلة على حد و لا على نفسي 
يا رب خليني خفيفة لحد ما أمشي 

أنا عايزة حُب 
عايزة حد يحافظلي على شوية الطاقة اللي عندي 

حد يجي فتح نوتة من النوتات بتاعتي فيشوف الحاجات الكتير المترقمة و متأجلة إنها تتعمل ، ياخدني من إيدي و نعملها سوا إحنا الإتنين .. 
حد يخليني أشع بهجة بمجرد وجوده 

نمشي في الشوارع نوزع إبتسامات و حُب على خلق الله 

حد يجي يسندني و يتسند عليا 
حد يكون وَنس 
ماما مش فاهماني 

بس أنا عايزة رفيق للروح من دلوقتي لحد أبدية الجنة 
عايزة قُرب و حب 

بص بقى يا سي مايو 
أنت عارف إن علاقتنا ببعض متوترة من زمان جداً 
و إنك مبتجيش إلا لما تخلي حد منهم يفارقني 
بس المرادي بقى أنت مزودها 
ما هو مش معنى كده إنك تخلي أقرب واحدة ليا تتجرح من البني آدم الوحيد اللي حبيته 
و لا إنك تفارق بينهم .. ليه كسرت قلبها ؟

أنا فعلاً لسه مستعدة ليك السنادي و عارفة إنك مش ناوي تجيبها البر 
بس اتفضل بقى اتصرف معاها ، يا تخليها كويسة و ترجع تاكل بدل ما هي شبه الميتين كده ، يا ترجعلها حبيبها 
مايو أنت مقرف بجد ، أنا بكرهك